(13)
أريد حباً
جلست ثناء ظهر يوم الخميس مع صديقتها حسناء يشاهدان سويا مسلسل اريد رجلا وقد ساد الصمت لحظات قبل ان تمصمص ثناء شفتيها هاتفة في حسرة:- شفتي سليم بيحب أمينة قد ايه؟؟؟ حسرة عليا
سألتها حسناء متعجبة:- بتقولي كدا وانتي لسة متجوزة وعروسة جديدة؟؟؟؟؟ اومال بعد عشر سنين حتعملي ايه
هتفت ثناء في قهر:- ماهو دا اللي قاطع بيا يا حسناء ...اني لسة عروسة ومع ذلك مافيش المشاعر دي
حسناء بقرف:- قاطع بيا؟؟؟؟؟ بصي يا ثناء انا صديقتك ومش حغشك جوزك ممكن يكون عنده حق
هتفت ثناء مستنكرة: ازاي يعني؟
قالت حسناء بغيظ: انتي عاوزاه يعاملك زي ماسليم بيعامل امينة صح؟؟؟؟ يبقي تعملي زي ما أمينة بتعمل لسليم بسيطة
هتفت ثناء: اه اللي هو اييييييه؟
اجابتها حسناء: اولا عمرك شفتي امينة طول الميت حلقة دول قالت قاطع بيا ؟؟ولا حسرة عليا؟؟ لأ طبعا ماحصلش....نقي الفاظك شوية يا ثناء اتعلمي تكوني رقيقة
رمقتها ثناء بنظرة استنكار وقبل أن تعقب أشارت اليها حسناء قائلة: -وثانيا ايه اللي انتي لابساه دا وانتي لسة عروسة جديدة والله انا اول مادخلت وشفتك بالجلابية افتكرت جدتي الله يرحمها ...أمينة مابتلبسش جلاليب
هتفت ثناء مستنكرة:- دي لسة جديدة بشوكها ارميها يعني
هتفت حسناء مغتاظة: ياشيخة بلاقرف بشوكها ايه روحي شحتيها لحد ....انتي شفتي امينة بتلبس جلاليب؟؟؟
اجابتها ثناء بغيظ: لا هتفت حسناء: يبقي خلاص البسي زيها ... قالت ثناء بضيق : ماشي وبعدييييييين؟؟
قالت حسناء برفق: ولاقبلين ...الموضوع بسيط ياثناء ...أمينة مش جميلة بالعكس انتي أجمل منها بس أسلوبها.. لبسها ...دلعها ..سهوكتها ...لازم تتعلمي السهوكة
سألتها ثناء بغيظ: اه بتتسهوك قوي....طيب اتسهوك ازاي ما انا مابعرفش قالت لها حسناء ضاحكة : عارفة انا حعلمك....مثلا هو راجع اهو من سهرته مع اصحابه بدل ما تفتحي له موشح اتأخرت ليه ممكن تقوليله كدا بس بأسلوب تاني يخليه يدوب فيكي بدل مايهج منك
هتفت ثناء: ازاي قالت حسناء: مثلا انتي قاعدة قدام التلفزيون اهو وهو داخل تلتفتي له براسك بهدوء وتسأليه: انت جيت ياحبيبي....شفتي تعبير وشي؟؟؟ النظرة اللي فيها عتاب مع شوية حب دي
هتفت ثناء بغيظ: ودي اعملها ازاااااااي دي قالت حسناء في حماس: جربي كدا انا حساعدك التفتت ثناء وهتفت :: انت طبيت ياحبيبي?
هتفت حسناء: طبيت ايه الهي يطب عليكي عزرائيل يابعيدة ...جوزك كدا حيجري وراكي بسكين ....اعملي زي ما بقولك بالظبط
ثناء : يووووووه ....ماشي انت جيت ياحبيبي؟
هتفت حسناء بكمد: انا بقولك تقوليها بأسلوب امينة مش بأسلوب خيرية احمد....ارحمينا
ثناء بنفاذ صبر: انت جيت ياحبيبي؟
حسناء : طيب بترفعي حواجبك ليه بقي؟؟؟؟؟ بتستحلفي له؟؟؟ دا قرف ايه دا
ثناء: يووووووووووووه اعملها ازاي دي؟
حسناء: معلش ماهي مش حتيجي من اول مرة لازم تدربي كويس السهوكة يابنتي فن
هتفت ثناء مغتاظة: علشان اتسهوك لازم يكون السهوكة نابعة من جوايا يا حسناء....لازم احسها
هتفت حسناء: ماهو كله بيجي بالتدريب يابنتي بس لازم صبر
هتفت ثناء: يووووه يعني علشان كلمة حلوة منه واهتمام مش حيكلفه حاجة اعمل دا كله ....امثل واتدرب ياسلام؟؟؟ وهو ليه برضة مايبقاش زي سليم....دا لو دخل عليكي بكرشه دلوقتي حترجعي من القرف
حسناء: انتي اعملي اللي عليكي وهو شوية في شوية حيتغير واكيد حيحبك زي ماسليم حب أمينة
... ثناء : -اللهم طولك يا رووووح ماشي كملي
حسناء في حماس:- دلوقتي حتغيري الجلابية بحاجة شيك من لبسك وتحطي بارفان مختلف كل يوم وشوية مكياج حلوين كدا وتحضري العشا مع شمعتين
هتفت ثناء: اهو الفت والملوخية عملتهم ومستنياه يتغدي
هتفت حسناء في اشمئزاز:- فت ايه الله يقرفك بقول عشا خفيف علي ضوء الشموع تقولي لي فت وملوخية؟؟؟ اعوذ بالله
هتفت ثناء: ماهو اللي طلب كدا
حسناء: ماشي غيري نمط الاكل كمان شوية وبعد دا كله يا ثناء الاسلوب...الاسلوب اهم من الشكل
أكملت ثناء: السهوكة عارفة
حسناء: اه الرجالة يموتوا في الست المسهوكة ...متفقين؟؟؟
ثناء بعدم اقتناع: متفقين لحظات وأتي حسين هاتفا: ثناااااااء انتي فين يا ثناااااااء
ارتعدت حسناء قائلة: هو دا حسين ...مال صوته ?
قالت ثناء متهكمة: استني هو انتي لسة شفتي حاجة اتي حسين مسرعا وهتف: حضرتي الفت والملوخية ياثناء ...حموت من الجوع
هتفت حسناء في ارتياع وهي تتأمل كرشه : يالهوي ....طيب انا حستأذن انا بقي الله يكون في عونك
قالت ثناء: ماتقعدي شوية لسة بدري
هتفت حسناء وهي تتجه للباب: لا كدا كفاية ...بقولك ايه خليكي بالجلابية حلوة ...وبلاها برفان ومكياج ....انتي عارفة ان سليم اتجوز علي أمينة ؟؟؟ وأمينة خلعته؟؟؟؟ هتفت ثناء في ارتياع: بجد؟ اجابتها حسناء: والله جد الجد قالت ثناء: طيب روحي انتي بالسلامة بقي....ودعت حسناء ثم التفتت الي زوجها هاتفة : كنت فين ياسي حسيييييين....اتأخرت ليه كل دا ياحسييييييين....شكل الليلة دي حتبقي طين عليك ياحسييييييييييين تمت