(15)
أين كلسوني ؟
وقف حسين يتأملها في دهشة وقد قلبت محتويات الدولاب رأسا علي عقب تبحث في كل اتجاه قبل أن يهتف: مش معقول كدا ياثناء لسة مالبستيش لغاية دلوقتي ؟ الناس مستنينا تحت علشان نبدأ الحفلة
هتفت ثناءفي عصبية: استني شوية ياإحسيييين الله يخليك
ارتفع حاجباه وهو يردد: احسيييين؟؟ ماشي يالا ثناء للناس تحت خلصي
هتفت في عصبية: مش لاقياه ومش عارفة راح فين
تساءل في دهشة: هو ايه اللي انتي مش لاقياه الفستان قدامك اهو
هي في غضب: مش الفستان ياإحسييين الكالسون مش لاقية الكالسون
ردد مبهوتا: كالسون؟ اي كالسون
هتفت في غيظ: الكالسون البني كان هنا اختفي فين
قال مهدئا: حبيبتي انا لقيته ولبسته الجو ساقعة نسيت اشكرك عليه
هتفت : ايه ؟ لبسته ازاي دا بتاعي
هتف : بتاعك ازاي دا رجالي
هتفت : مش مهم المهم انه بيدفي
هتف مستنكرا: حتلبسي كالسون تحت الفستان السوارية ياثناء
هتفت : ما انت لابسه تحت البدلة السينيه ياحسييين
لو سمحت اقلعه دلوقتي
هتف في نفاذ صبر: ثناءء ماتطلعيش زرابيني البسي الفستان وانزلي علشان نقابل ضيوفنا
هتفت في عناد: مش حنزل ياحسييين الا لما اخد كالسوني
حماة ثناء لابنها : اطلع شوف اخوك ومراته صوتهم عالي ليه ...وكالسون ايه اللي بيتخانقوا عليه اتفضحنا وسط الخلايق😂
فوق زوج ثناء: وانا اللي كنت فاكرك حسيتي بيا واشترتيه ليا هدية علشان ما أبردش؟ اتاريكي أنانية وجاحدة😂
هتفت: لا ماتدخليش من السكة دي مش باكل من الكلام دا انا عاوزة كالسوني
هتف في مرارة : للدرجة دي كالسونك اهم عندك مني
هتفت في إصرار: معلش اقلعه ونتفاهم بعدين في النقطة دي
هتف : الناس تحت تقول ايه علينا واحنا بنتكلم في الكالسون
هتفت ثناء بعلو صوتها: حيقولوا ايه يعني ....كلهم لابسين
امسك كل واحد من الضيوف بملابسه في حذر فمال احدهم علي زوجته قائلا: انتي لابسة كالسون؟
قالت في ترقب: الكدب خيبة ...لقيته بيدفي لبست من بتوعك
هتف بها: تخرجي من الحفلة علي بيت امك علي طول
صرخت : يامصيبتك يابدرية
غمغمت حماه ثناء: يافضيحتك وسط جيرانك يا شوقية
فوق زوج ثناء: حتنزلي ولا لأ كفاية جرسة وسط الناس
ثناءء: لا مش حنزل الا لما تقلع الكالسون
هتف في غضب: مش حقلعه يا ثناء ...عليا النعمه ما انا قالعه😂
وخرج من الغرفة في سرعة فجرت وراءه وهي تهتف في رجاء: لا ياأحسيييين الا الكالسون ياحسيييين ....ردهولي
تركها وغادر المنزل فصرخت: لااااااااااا كالسوووونيييييبيي
ثم انهارت باكية في حرقة
تمت