(19)
زوجى والصيام
ام ثناء وهي تربت علي ظهر ثناء: يابنتي استهدي بالله ..احنا في صيام وشهر كريم ..
ثناء باكية : خلاص ياماما ماعدتش مستحملة شوفوا لي حل
هتفت امها : يعني نعملك ايه يعني ياثناء ؟ نقول للراجل ماتكلش؟؟؟ كمل صيام علشان بنتنا ترتاح
ثناء صارخة: ياماما ماياكل ...هو انا قلت لأ ...بس بالمعقول ...زي ما الناس بتعمل ...إنما من ساعة ما بدأنا رمضان وزي مايكون داخلين سباق في الاكل ياماما ...كل يوم خناق وزهق وانا اعصابي اتحرقت
امها مهدئة : معلش ياحبيبتي استحملي شوية ...هم كلهم كدا في رمضان روحهم في مناخيرهم
ماهم محرومين من اعز حاجة بيحبوها الاكل والشرب 😂
هتفت ثناء في غضب: طيب ما أنا كمان صايمة
ياماما انتي مش متخيلة ....العصر بس يأذن يخرج عليا من اوضته زي الغول ..يجري علي المطبخ يرزع في الحلل ويبدأ الصريخ زي المجنون ...الرز قليل ليييييييييه وببقي عاملة أربعة كيلو رز ياماما
ويقولي هي اللحمة فييييييييييييين ...وببقي حاطة فخدة كاملة في الفرن ...ماهو الفرن لو ياخد عجل بحاله حعمل بس ادي الله وادي حكمته 😂
واقوله يا حسين ياحبيبي الاكل كتير وحيفيض يتنطط لي في المطبخ زي اليويو ...مش حيكفي
انا صائم وحاكل....وعاوزني اعمله بدل الصنف عشرة وانا صحتي في النازل ياماما
امها بقلق وهي تنظر الي الساعة: يابنتي معلش ماهو ابوكي كدا برضة ...انتي مابتشوفيهوش في رمضان بيعمل فينا ايه
هتفت ثناء باكية : اه بشوف ...ماكنتش اتخيل اهرب منه هنا الاقي زيه هناك ياماما ...
امها وهي تضرب بيديها : كلهم كدا يابنتي ولمي الدور بقي علشان ابوكي قرب يقوم من نومه وحيسود عيشتي لو دخل المطبخ ومالقانيش خلصت الخشاف
هتفت ثناء : اهو الخشاف دا بعمله بالجردل كل يوم ومش عاجبه ....طلقوني النهاردة منه
قاطعهم صوت جهوري : يا أم ثناااااااااااااااااااء
هتفت ام ثناء في ذعر: شفتي اهو قام اهو وحيخلي يومنا هباب عجبك كدا انتي وحسين بتاعك ؟
هتف ابوها ثانية : يأ أم ثناااااااااااااااااااء
هتفت ام ثناء : يقطع ثناء علي ام ثناء ...أيوة ياخويا جاية لك اهو
اقتحم عليهم الغرفة وهتف : ايه ياولية لسة ماقمتيش تعملي الفطار
هتفت ام ثناء : حقوم اهو ياخويا بس لسة بدري قوي
هتف في غضب : لا مش بدري ماهو الاكل لما بيتعمل بسربعة مابيبقاش حلو...
هتفت ثناء مدافعة من بين أسنانها : يابابا الساعة لسة عشرة الصبح والفطار الساعة سبعة بالليل ..حنقف في المطبخ نهبب ايه ..ااقصد نعمل ايه دلوقتي
ابوها مزمجرا: مش في خشاف لازم يسقع ومشاريب لازم تتحط في التلاجة من بدري؟؟؟ مش في حلويات لازم تتجهز وشربات لازم يتعمل ويبرد ؟ مش في طيور جوه عاوزة انظف وخضار يتغسل ؟؟؟؟ ايه حتقعدوا تتسامروا مع بعض وامك تكروت لي الاكل المغرب وتقولي نسيت؟؟؟؟ قسما برب العزة لو لقيت فسوة ناقصة في الاكل لابعتك علي بيت امك النهاردة يا أم ثناء 😂
اتسعت عينا ثناء في رعب وهي تتأمل والدها الذي انقلبت سحنته بشكل فظيع بينما هتفت والدة ثناء وهي تقوم : قايمة اهو ياخويا قايمة ...انت ريح بس في اوضتك وانا حعملك كل اللي انت عاوزه...تعالي ياثناء نكمل كلامنا في المطبخ
ذهبت ثناء معها الي المطبخ هاتفة : لا ياماما دي عيشة تقصر العمر ...انا مش حكمل رمضان كدا
فقالت امها : اسمعي ياثناء من أمك حسين مش هو حسين وهو جعان ولا ابوكي بيبقي ابوكي وهو صائم ....دول يابنتي بيبقوا عاملين زي الزومبي وهم جعانين واول مابياكلوا بيفوقوا وبيرجعوا لطبيعتهم الأصلية ...فلازم نعدي الشهر دا علي خير
ابوها : يا ام ثناااااااااااااااااااء
حمصي عيش الفت كويس بزبدة
هتفت ام ثناء : حاضر ياخويا
هتف : وتسلقي لحمة الموزة معاها مش عاوز من الفخدة ...لو سلقتي الفخدة حقلب لك الاكل فوق راسك 😂
زفرت ثناء في عصبية بينما هتفت امها: خلاص ياخويا فهمت
هتف ثانية من غرفته : ثناااااااااااااااااااء ...حتفطري معانا ؟؟؟؟ لو حتفطري معانا خلي امك تزود السلطة
صرخت ثناء في عصبية : مش حفطر يابابا مش حفطر
اقتحم امجد المطبخ هاتفا: ماما حتعملي لنا اكل ايه النهاردة
امه : فتة بالخل والثوم ولحمة موزة وملوخية وبط وارز وصينية رز معمر وبسبوسة وجلاش ومحشي ورق عنب
امجد باستنكار : بس؟؟؟؟ هو دا الفطار ؟
صرخت ثناء : لا يا أمجد واختك ثناء مشوية في الفرن .حلو كدا؟
... 😂
ابو ثناء: يا أم ثناااااااااااااااااااء
هتفت ثناء وهي تجري من المطبخ : يارب تعدموا ثناء في الشهر المفترج دا وترتاحوا منها
امها وهي تجري وراءها: رايحة فين يابنتي بس
ثناء وهي تجري الي الخارج : رايحة بيتي ياماما ...هناك زومبي واحد لكن هنا اتنين ...الله يكون في عونك 😂
وانطلقت بأقصي سرعتها عائدة الي منزلها
تمت